[申情申音]上海女人的“嗲”与“发嗲”-亿点开心网

作者：马尚龙

改编、朗读：丁迪蒙

图片来自网络

[原标题]《问问上海女人看，嗲搭仔发嗲意思一样伐？》

一个女人拨人家辣背后议论：“侬觉得着伐，伊蛮嗲个。”还有个女人同样辣拨人家背后头议论：“你侬觉得着伐，她伊蛮会得发嗲个”。

嗲搭仔发嗲意思一样个伐？侪是褒义？侪是贬义？还是一个褒一个贬呢？

上海人会得搭侬讲，讲女人嗲，搿是褒义，讲女人辣发嗲则是贬义。

嗲是从里而外个自然流露出来个，发嗲则是像吹洋泡泡一样硬劲吹出来个。发嗲搭仔嗲个关系，类似于东施效颦。

经常可以辣媒体浪看到对“嗲”个各种说法，常常就是女人辣讲，看上去侪是老嗲老嗲个，必过，像我搿种写过《上海女人》个人来看，啥人是真个嗲，啥人是辣辣发嗲，啥人是装出来个嗲，只要一看就可以看出来了。

“哦哟，侬哪能介嗲个啦？”“侬辣发啥个嗲啦？”“嗲勿煞侬唻！”一个女人假使拨人家搿能讲个闲话，葛末，搿个女人是拨人家讨惹厌个。

大多数个男人喜欢碰着一个嗲个女人，但是邪气讨厌碰到一个发嗲个女人；假使碰到一个女人勿仅仅发嗲，而且还口口声声讲自家老嗲个，是嗲妹妹，搿实在是让人汗毛凛凛个。道理邪气简单，发嗲个人是勿嗲个人。嗲应该是让人家感觉个，勿是自家去讲出来个。

林黛玉是最嗲个，辣《红楼梦》里就呒没第二个拨称做妹妹个，说明伊个嗲是拨大家公认个，但是，伊从来勿讲自家是嗲妹妹。相反，倒是一直勿承认自家是邪气嗲个：“我勿配个呀，我哪能比得上宝姐姐呢？”

当然，发嗲个女人实在是勿少，以嗲自居个女人也有交关。有个自称是嗲妹妹个小女人，伊常庄发嗲个，但是一转身，拿起手机，哇啦哇啦，声音具有邪气刺耳朵个穿透力，搿就是伊本质浪勿嗲个一面。

应该承认，嗲要包括一个女人个各个方面，娇媚、温柔、情趣、谈吐、姿色、出身、学历、技艺，还要包括伊个身高、音色、体重等等生理因素。

因为嗲，当一个女人做对了啥事体，或者做错了啥事体个辰光，伊会得更加容易获得人家个认同或者宽容。面对女人个嗲搭仔勿嗲，命运是勿公道个。看到了人家因为嗲而获得利益了，就会有人也来发嗲了。“金丝鸟”本来是老嗲个称呼，现在却是变种了，欢喜养鸟个男人独独勿养金丝鸟。

有一日天，一个女小囡开车，因为刚刚拿到驾照，来勿及刹车，撞到前头小车个后屁股浪，虽然是勿大严重，但是毕竟是拿人家个尾灯撞坏脱了。女小囡下车，前头车子浪个男人已经冲过来了，面色还邪气难看。女小囡先开口：“勿好意思，我哪能会得撞着侬个啦？”男人心里就想：废闲话，侬撞我，还要问哪能会得撞着我？但是看伊倒是一眼也勿赖，承认是撞伊了，搿男人个火就发勿出来了：“哪能撞要问侬个呀。”女小囡又问：“葛末，葛末……撞坏脱了勿啦？”男人就笑出来了：“尾灯也被侬撞下来了，还问撞坏脱了伐。”女小囡又讲：“葛末，要紧勿啦？”男人有眼哭笑勿得：“侬讲要紧伐？”“葛末，要赔侬勿啦？”“哦哟，算了算了，算我倒霉。我自家去进保险伐。下趟开车子要当心点噢。”女小囡最后个一句闲话又刚好是第一句闲话：“勿好意思噢。”

假使搿个女小囡长得黑不溜秋，小眼睛、大嘴巴、塌鼻头，声音沙哑，看勿到腰身，虽然搿眼侪勿好算缺点，但是嗲是讲勿上了，讲勿定也就要赔人家个尾灯了。

所谓嗲，就是娇滴滴。望文生义，就好比是老清早树叶上头个一滴露珠，树叶有眼撑勿牢露珠个重量，露珠辣树叶上头慢慢叫淌下来；搿滴露珠假使忒重，就会得一记头从树叶上头滑下来，假使忒轻了呢，就沾辣树叶浪向，勿会挂辣树叶个尖尖头浪个；当侬看到一滴露珠就挂辣树叶个尖尖浪，将滴还没滴，就是娇滴滴，就是嗲到了恰到好处。

嗲是一种分寸，是一部分女人天然个黄金把握。搿种黄金把握个意思是，伊个嗲具有精密度搭仔精准度，而搿两个度，就像一个人个肤色，几乎就是天生个。

以上文字是我辣《上海女人》一书当中写到个。一晃十年过去了，“上海女人”仍旧是一个符号，而且邪气玄妙。“嗲”只是搿一个非常玄妙个符号当中邪气小个符号，更重要个符号，也就是核心竞争力，根本勿是嗲可以概括个。

前段时间，著名电影表演艺术家梁波罗老师有一段有关上海市井生活个沪语朗读，传播邪气广，其中也讲到了“嗲”，并且讲出了嗲也是一种青春饭：小姑娘个嗲是糯米嗲，小女人个嗲是豆腐嗲，中年女人个嗲就有眼难听了，叫咸菜嗲，有眼刻薄，必过倒也有眼像个。

《上海女人》呒没讲嗲个实际内容，讲个是比嗲更加高级个气质，社会浪还是有点反响个。两个勿同个封面，是因为辣2007年蓝封面第一版个五年之后，出版社再版了。有眼人讲：看勿出，一个男人倒是拿上海女人写得蛮像个；当然，也有人勿屑一顾：搿种《上海女人》也算好个啊？勿要发嗲了吧。好像，是拿“上海女人”也骂进去了。

我们近期还发过：

[麦唐作][乐评]Flower，Farewell，Journey

[申情申音]为用上海话读古诗词的朋友们鼓掌